Аңдатпа

Бұл мақалада қазақ философиясының пайда болуы және даму тариы, қазақ қаумының дүниетанымдық көзқарастары және ұлттық ойлау дәстүрі мәселесі қарастырылды. Қазақ философиясы мен қазақ халқының ұлттық дүниетанымы ел тарихының ең маңызды құрамдас бөліктерінің бірі. Онда ғылыми таным процесі мен халықтың идеялық ізденістері, бай тарихы мен ұлттық ойлау айшықтары көрініс тапқан. Осы тұрғыдан мақалада, қазақ философиясы халқымыздың тарихын жан-жақты түсіну үшін үлкен негіз және методологиялық құрал екендігі сөз болды. Сондықтан оны зерттеп, үйренбейінше қазақ ғылымының тарихын, саяси идеологиясын, өнерін, әдебиетін, адамгершілік қағидаларын, діндарлығын және т.б. пайымдау мүмкін еместігі мақаланың зерттеу нысанына айналды.
Халықтың ұлт-азаттық қозғалысымен тығыз қоян-қолтықтасқан қазақ философиясы ғылыми құндылығымен қатар, жоғары азаматтық қасиетімен, әлеуметтік әділеттілікке жету жолдарын тікелей іздеуге атсалысқандығымен, өзінің жемісті жетістіктерімен ерекшеленеді. Қазақ философиясы еліміздің рухани-мәдени тәуелсіздігінің көрінісі және қазақ қауымының ішкі бірлігінің рухани тірегі болып табылады. Ол адамзат тарихында ғасырлар бойы қалыптасқан әлемдік философияның ажырамас құрамдас бөлігі екені де белгілі. Қазақ халқының философиялық-қоғамдық ой пікірлерін зерттеу XX ғасырдың басынан қолға алына бастады.